ડિજિટલ સુરક્ષાને પ્રાથમિકતા: બ્રિટનમાં સોશિયલ મીડિયા નિયમો વધુ કડક બનશે

યુકેના પ્રધાનમંત્રી સર કિયર સ્ટાર્મરે ૧૬ વર્ષથી નાના બાળકો માટે ટિકટોક, સ્નેપચેટ અને ઈન્સ્ટાગ્રામ સહિતના મુખ્ય સોશિયલ મીડિયા પ્લેટફોર્મ પર પ્રતિબંધ મૂકવાની યોજના ઘડી છે. સરકાર બાળકોને “સુરક્ષિત” સાઇટ્સ પર લાઇવસ્ટ્રીમ કરવાથી અને ગેમિંગ એપ્સ પર અજાણ્યા લોકો સાથે વાત કરવાથી પણ રોકશે. મંત્રીઓ બાળકો માટે સોશિયલ મીડિયા કર્ફ્યૂ લાગુ કરવા પર પણ વિચાર કરી રહ્યા છે, જેની વધુ વિગતો આવતા મહિને જાહેર થશે.

ઓસ્ટ્રેલિયાએ ડિસેમ્બર ૨૦૨૫માં ૧૬ વર્ષથી નાના બાળકો માટે સોશિયલ મીડિયા પર વિશ્વનો પ્રથમ સંપૂર્ણ પ્રતિબંધ લાગુ કર્યો હતો. UK ની આ યોજનાને Whitehall સૂત્રો “Australia-plus” તરીકે વર્ણવી રહ્યા છે.

પ્રધાનમંત્રી સર કિયર સ્ટાર્મરે કહ્યું: “આ પસંદગી છે કે આપણે કોની બાજુ છીએ — દેશભરના પરિવારોની, કે એવી વ્યવસ્થાની જે કામ નથી કરી રહી."

સંડે ટાઈમ્સના અહેવાલ અનુસાર, ઓસ્ટ્રેલિયામાં જે ૧૦ પ્લેટફોર્મ પ્રતિબંધિત છે તે જ UK માં પ્રતિબંધિત થઈ શકે છે: ટિકટોક, સ્નેપચેટ, ઈન્સ્ટાગ્રામ, યુટ્યુબ, રેડિટ, ટ્વિચ, એક્સ (ટ્વિટર), થ્રેડ્સ, ફેસબુક અને કિક.

સરકારના ત્રણ મહિનાના સર્વેક્ષણમાં કુલ ૧,૧૬,૦૦૦ પ્રતિભાવ મળ્યા: ૯૦% વાલીઓએ ૧૬ વર્ષથી નાના બાળકો માટે સોશિયલ મીડિયા પ્રતિબંધને ટેકો આપ્યો, ૮૩% થી વધુએ કહ્યું કે સોશિયલ મીડિયાના ફાયદા કરતાં જોખમ વધારે છે.

મોલી રસેલના પિતા — જેમની ૧૪ વર્ષની દીકરીએ ઓનલાઇન હાનિકારક સામગ્રી જોયા બાદ આત્મહત્યા કરી હતી — તેઓ આ પ્રતિબંધથી નારાજ છે. તેમનું કહેવું છે કે આ પ્રતિબંધ “સુરક્ષાની ખોટી ભાવના” ઊભી કરશે, બાળકોને ઇન્ટરનેટના અન્ય ખૂણે ધકેલશે અને તેમને જોડાણથી વંચિત કરશે. ઈયાન રસેલે BBC ને કહ્યું: “જો તેઓ રાજકારણ રમી રહ્યા છે, તો તેઓ યુવાનોના જીવ સાથે જુગાર રમી રહ્યા છે — અને મને આ ઘૃણાસ્પદ લાગે છે."