'સંસ્કારી' છબીથી ગૂમનામી સુધીનો સફર! આલોક નાથ પર નારાયણી શાસ્ત્રીનું મોટું નિવેદન

એક સમય એવો હતો જ્યારે અભિનેતા આલોક નાથ ટીવી અને ફિલ્મોમાં સંસ્કારી પિતાની છબી માટે જાણીતા હતા. પરંતુ વર્ષ 2018 દરમિયાન તેમના પર લાગેલા #MeToo આરોપો બાદ તેમની કારકિર્દીને મોટો ઝટકો લાગ્યો. આ વિવાદ પછી તેઓ ધીમે ધીમે ફિલ્મો અને ટીવીની દુનિયાથી દૂર થતા ગયા અને આજે તેઓ જાહેર જીવનમાં ખૂબ ઓછા જોવા મળે છે.

હાલમાં અભિનેત્રી નારાયણી શાસ્ત્રીએ એક ઇન્ટરવ્યૂ દરમિયાન આલોક નાથ વિશે વાત કરતાં જણાવ્યું કે તેઓ ઘણીવાર દારૂ પીતા હતા. જોકે તેમણે એ પણ સ્પષ્ટ કર્યું કે તેમની સાથે કામ કરતી વખતે આલોક નાથે ક્યારેય તેમની સાથે અયોગ્ય વર્તન કર્યું નહોતું. નારાયણીએ પોતાના અનુભવના આધારે વાત કરી હતી અને અન્ય લોકો દ્વારા કરવામાં આવેલા આરોપો અંગે કોઈ વ્યક્તિગત ટિપ્પણી કરી નહોતી.

મીટૂ આંદોલન દરમિયાન લેખિકા અને નિર્માતા વિન્ટા નંદા સહિત કેટલીક મહિલાઓએ આલોક નાથ પર ગંભીર આરોપો લગાવ્યા હતા. આ આરોપો બાદ તેમને ભારે ટીકા સહન કરવી પડી હતી અને તેમની વ્યાવસાયિક કારકિર્દી પર પણ તેની સીધી અસર જોવા મળી હતી. ત્યારથી તેઓ મનોરંજન જગતથી લગભગ દૂર છે અને જાહેર કાર્યક્રમોમાં પણ ભાગ્યે જ જોવા મળે છે.

આલોક નાથ સામેના આરોપો અને ત્યારબાદ થયેલા વિવાદોએ એક સમયના લોકપ્રિય અભિનેતાની છબીને સંપૂર્ણપણે બદલી નાખી હતી. હાલમાં તેઓ ગૂમનામીભર્યું જીવન જીવી રહ્યા છે, જ્યારે નારાયણી શાસ્ત્રીના તાજેતરના નિવેદન બાદ આ મુદ્દો ફરી એકવાર ચર્ચામાં આવ્યો છે.