સોનુ નિગમની સાદગીએ જીત્યા દિલ, પોતાની ધૂન પર ઝૂમતા ફેન્સ પાસે જઈને સિંગરે ચોંકાવ્યા

“મારો શો તો ફેન્સની કારમાં જ શરૂ થઈ ગયો છે”, સિંગરના આ વીડિયોએ ઈન્ટરનેટ પર આગ લગાવી બોલિવૂડના ‘મેલોડી કિંગ’ સોનુ નિગમ અવારનવાર પોતાની ગાયકીથી લોકોને દીવાના બનાવે છે, પરંતુ આ વખતે તેમણે પોતાની સાદગી અને દરિયાદિલીથી સૌના દિલ જીતી લીધા છે. સોશિયલ મીડિયા પર અત્યારે એક વીડિયો ઝડપથી વાયરલ થઈ રહ્યો છે, જેમાં સોનુ નિગમે નેધરલેન્ડના રોટરડેમના રસ્તાઓ પર પોતાના ફેન્સને એવું સરપ્રાઈઝ આપ્યું, જેની તેમણે કલ્પના પણ કરી નહોતી. આ ઘટના કોઈ ફિલ્મી સીનથી ઓછી નહોતી. રોટરડેમમાં એક મોટા કોન્સર્ટ પહેલા સોનુ નિગમ પોતાની કારમાં બેસીને વેન્યુ તરફ જઈ રહ્યા હતા, ત્યારે કંઈક એવું બન્યું જેણે સિંગરના ચહેરા પર એક પ્યારી મુસ્કાન લાવી દીધી.