શું છે ‘SMS Of Death ’? એક સંદેશથી સ્માર્ટફોન થઈ શકે છે સંપૂર્ણપણે ખરાબ

આજકાલ સ્માર્ટફોન લોકોના જીવનનો અગત્યનો ભાગ બની ગયું છે. બેંકિંગ, વ્યક્તિગત વાતચીત, ખરીદી અને મનોરંજન જેવા અનેક કામ મોબાઇલથી થાય છે.પરંતુ સ્માર્ટફોન માટે એક નવો સાયબર ખતરો સામે આવ્યો છે, જેને ‘SMS Of Death ’ કહેવામાં આવે છે. આવા ખતરનાક સંદેશોથી મોબાઇલની કામગીરી ખોરવાઈ શકે છે અને ક્યારેક ઉપકરણનો ઉપયોગ મુશ્કેલ થઈ શકે છે.

સાયબર સુરક્ષામાં આવા હુમલાઓને ગંભીરતાથી જોવામાં આવે છે, કારણ કે સામાન્ય દેખાતા સંદેશની પાછળ પણ નુકસાન પહોંચાડવાનો આશય છુપાયેલો હોઈ શકે છે.'SMS Of Death' એ એવો ખાસ તૈયાર કરેલો સંદેશ છે, જે મોબાઇલની સંદેશા વ્યવસ્થા અથવા સોફ્ટવેરની ખામીનો ફાયદો લઈ ફોનમાં સમસ્યા ઊભી કરે છે. ક્યારેક સંદેશ મળતાં જ સંદેશા વ્યવસ્થા બંધ થઈ જાય છે, ફોન વારંવાર બંધ થઈ શકે છે અથવા તેની કામગીરી ધીમી થઈ શકે છે.

આ હુમલામાં સામાન્ય રીતે ઉપકરણની અંદરની તકનીકી ખામીનો ઉપયોગ થાય છે. તેથી દરેક સંદેશ ખતરનાક નથી, પરંતુ ખાસ તૈયાર કરેલો સંદેશ નબળી સુરક્ષાવાળા ઉપકરણને અસર કરી શકે છે.મોબાઇલમાં સંદેશ મળતા તેની વ્યવસ્થા તેને વાંચી અને બતાવે છે. જો સંદેશમાં એવી રચના હોય કે જે મોબાઇલનું સોફ્ટવેર સારી રીતે હેન્ડલ કરી ન શકે, તો ખામી ઊભી થઈ શકે છે.

તેના પરિણામે સંદેશા વ્યવસ્થા બંધ થઈ જાય છે, મોબાઇલ અટકી શકે છે અથવા કેટલીક સુવિધાઓ કામ કરવાનું બંધ કરી શકે છે. પરંતુ દરેક પ્રકારના આવા હુમલાથી ફોન કાયમી ખરાબ થાય છે એવો દાવો યોગ્ય નથી. તેની અસર ફોનના મોડલ, સોફ્ટવેર અને સુરક્ષા પર આધારિત છે.જૂના સોફ્ટવેરવાળા સ્માર્ટફોનમાં સુરક્ષાની ખામીઓ વધારે રહેવાની શક્યતા હોય છે. જો કંપનીના સુરક્ષા સુધારા સમયસર અપડેટ ન થાય, તો આવા ઉપકરણો સાયબર હુમલાનો શિકાર બની શકે છે.

ખાસ કરીને જે લોકો લાંબા સમયથી સુધારા નહીં મળતા મોબાઇલ વાપરે છે, તેમને વધુ સાવચેતી રાખવી જોઈએ. પરંતુ આધુનિક સ્માર્ટફોન પણ સંપૂર્ણપણે જોખમમુક્ત છે એવું કહી શકાતું નથી.