અમેરિકાની આઝાદીનાં 250 વર્ષ : એ ચિત્ર જેણે બ્રિટિશ સામ્રાજ્ય સામે બગાવત ફૂંકી

1770ના બૉસ્ટન હત્યાકાંડ વિશે પૉલ રેવિયર દ્વારા કરવામાં આવેલા લોહિયાળ ચિત્રણથી બ્રિટિશ શાસન સામેનો લોકોનો આક્રોશ ભભૂકી ઊઠ્યો હતો અને આ સાથે તે અમેરિકન ઇતિહાસમાં પ્રચારનું સંભવતઃ સૌથી અસરકારક ઉદાહરણ બની ગયું. પાંચમી માર્ચ, 1770ની સાંજે મૅસેચ્યુસેટ્સના બૉસ્ટનમાં જમીન ઉપર બરફની ચાદર છવાઈ ગઈ હતી. એક બ્રિટિશ પહેરેગીર કસ્ટમ હાઉસની રક્ષા કરતો ઊભો હતો. તેના બહાર નીકળી રહેલા ઉચ્છવાસ ગાત્રો થીજાવી દેતી ઠંડીમાં સફેદ ધુમ્મસનાં નાનાં વાદળો રચી રહ્યા હતા.