અમેરિકા-ઈરાન વચ્ચે ફરી વાકયુદ્ધ, ટ્રમ્પની ધમકી પર ઈરાનની કડક ચેતવણી

અમેરિકા અને ઈરાન વચ્ચે તણાવ વધતો જાય છે. અમેરિકાના રાષ્ટ્રપતિ ડોનાલ્ડ ટ્રમ્પે જણાવ્યું છે કે જો હોર્મુઝની જળસંધિમાં જહાજો પર હુમલો થશે, તો તેઓ ઈરાનના એક પુલ અથવા વીજ ઉત્પાદન કેન્દ્રને નિશાન બનાવશે. ઈરાને પણ સ્પષ્ટ શબ્દોમાં જવાબ આપ્યો છે કે તેઓ કોઈપણ હુમલાનો જડબાતોડ જવાબ આપશે.

ઈરાનના વિદેશ મંત્રી અબ્બાસ અરાઘચીએ જણાવ્યું છે કે જો અમેરિકા ઈરાનના ઈન્ફ્રાસ્ટ્રક્ચર પર હુમલો કરશે, તો તેનો મજબૂત અને નિર્ણાયક જવાબ આપવામાં આવશે. તેમણે વધુમાં ચેતવણી આપી છે કે આવા હુમલામાં જે કોઈ દેશ અથવા સંસ્થા અમેરિકા સાથે સહયોગ કરશે, તેને પણ ઈરાન યોગ્ય લક્ષ્ય માની શકે છે.

બંને દેશો વચ્ચે સતત નિવેદનબાજી અને સૈન્ય કાર્યવાહી વધી રહી છે. તેના કારણે મધ્ય પૂર્વમાં યુદ્ધ વધુ ભડકવાની આશંકા વ્યક્ત કરવામાં આવી રહી છે, જ્યારે વૈશ્વિક તેલ બજાર પર પણ તેની અસર જોવા મળી રહી છે.

આંતરરાષ્ટ્રીય સમુદાયે બંને દેશોને સંયમ રાખવાની અપીલ કરી છે. નિષ્ણાતોનું માનવું છે કે જો આ પ્રકારની ધમકીઓ અને જવાબી કાર્યવાહી ચાલુ રહેશે તો સમગ્ર મધ્ય પૂર્વમાં અસ્થિરતા વધી શકે છે અને વૈશ્વિક વેપાર તેમજ ઊર્જા પુરવઠા પર તેની ગંભીર અસર પડી શકે છે.